Prensa   |  Contacto   |  Pasadas edicións:  2014 - 2015 - 2016 - 2017

O Festival

A celebración dos océanos
© Rafa Pérez
© Lucas Vallecillos

Que é o festival?

O océano, fonte de vida imprescindible, atopa no Festival Mar de Mares unha plataforma multidisciplinar desde a que celebrar a súa riqueza, pero tamén desde a que alertar dos perigos que espreitan o que é o maior ecosistema do planeta. E A Coruña loce orgullosa o seu carácter atlántico durante os días de setembro, nos que o Festival a converte na capital do mar. Arte, ciencia, activismo, educación, gastronomía, deporte e emprendemento, todos os sectores e axentes da cidade unen forzas para converter Mar de Mares nun evento único por e para o océano.

MAR DE MARES 2018

En 2018, mostramos o mar como un escenario de aventuras, iniciativas de futuro, fonte de inspiración e soños compartidos. Os expertos calculan que, de seguir co modelo de sociedade de consumo actual, no 2050 haberá máis toneladas de plástico no mar ca de peixes, o que unido a outras ameazas que sofren os océanos provocará a súa desaparición como fonte de vida e riqueza. É necesario cambiar a nosa forma de relacionarnos co planeta e buscar unha forma de produción e consumo que evite que miles de toneladas de residuos cheguen cada ano ao mar. O que se coñece como economía circular, un modelo baseado na propia natureza onde non existe o lixo e onde todos os elementos son reutilizados en diferentes etapas. Para entender este novo concepto e coñecer iniciativas de éxito que xa están en marcha, teremos os Encontros Signus: No camiño cara a unha economía circular, que nos traerán un dos maiores expertos na materia, Nicola Cerantola, fundador de Ecologing.

Para axudarnos na conquista cotiá dunha nova relación co noso planeta e sumarnos ao cambio, contaremos con exemplos realmente inspiradores coma o das británicas Amy e Ella Meek, irmás de 12 e 14 anos, que nos contarán como emprenderon a campaña Kids Against Plastic para convencer os produtores, os comerciantes, os políticos e os usuarios de que rexeiten os plásticos dun só uso.

A ciencia volve ser protagonista no noso festival e comezamos cun evento que xunta Mulleres de mar e investigación, un monólogo de humor no que tres mulleres soben ao escenario para contarnos a importancia que ten a preservación dos océanos e, ademais, lembrarannos o difícil que é, ás veces, ser muller e científica.

Noutro exercicio de recuperación da intensa relación da cidade e do mar, este ano contamos cunha sede moi especial, o veleiro Juan de Lángara, co que poderemos observar A Coruña desde o mar nun paseo pola ría ao solpor.

A gastronomía e o emprendemento danse de novo a man nun dos pratos fortes do Festival, o Mercado do Mar, onde poderemos coñecer, degustar e mercar numerosos produtos mariños elaborados con fortes criterios de sustentabilidade, desde mariscos a conservas ata empanadas e cervexas. Ademais, teremos showcookings e concertos para gozar da comida e da música en familia. E os máis madrugadores poderán apuntarse ao almorzo mariñeiro preparado por Javier Ozores, O cru e o cocido, tras a visita á lonxa da Coruña.

Pero o mar é un lugar que, ademais de todo isto, nos ofrece o mellor escenario para cumprir os nosos soños, aventuras e empresas, un lugar para practicar deportes, viaxar, emprender e aprender. Telmo Aldaz de la Quadra Salcedo, fillo de mariñeiro e sobriño de aventureiro, leva nas súas veas a paixón polo océano e pola aventura e, de feito, transformouno nun modo de vida. Na súa charla co público, falaranos do seu compromiso con este hábitat natural e relataranos as súas anécdotas en mar aberto e, no seu encontro con estudantes, animaraos a atoparen o aventureiro que levan dentro.

Nas próximas semanas, Mar de Mares 2018 anunciará nomes e actividades que se irán sumando ao Festival e que converterán a nosa cidade, un ano máis, na capital dos océanos. Convén que esteas atento e que non perdas ningunha sorpresa.

 

Onde se celebra?

Só na Coruña podería ter lugar un festival coma Mar de Mares. Rodeada de mar, a súa configuración xeográfica, o seu porto, a súa historia mariñeira, o seu paseo marítimo de 13 quilómetros —o máis longo de Europa— convértena nun escenario perfecto para reivindicar o mar como un dos grandes motores económicos, culturais e de lecer de Galicia. Este ano, o Festival sae á rúa e utilizará a fachada marítima da Mariña. E, ademais das actividades ao aire libre, contará coa Fundación Paideia como sede principal para as actividades en espazo pechado.

Os museos científicos súmanse de novo como sede e, unha vez máis, aproveitamos as praias da cidade e a súa contorna para empaparnos de salitre. Se es de fóra da cidade, consulta a sección Ven á Coruña para informarte dos descontos que poñemos á túa disposición para a túa viaxe, así como das distintas opcións de aloxamento. Para coñeceres todos os recantos da Coruña que non podes deixar de visitar, consulta a web oficial de Turismo da cidade: www.turismocoruna.com.

Benvidos á quinta edición do Festival Mar de Mares. Todo listo para esta nova travesía…

Quen o organiza?

O Festival Mar de Mares está organizado por Caravan Proyectos de Cultura, Crearte Servizos Culturais e a Asociación Redes de Sal e conta co apoio de diversas institucións públicas, como o Concello da Coruña e a Consellería do Mar da Xunta de Galicia, pero tamén  recibe patrocinio privado e conta coa colaboración de numerosas institucións que traballan no eido mariño.

Caravan Proxectos de Cultura é unha empresa de xestión cultural cuxos profesionais suman longos anos de experiencia no sector. Ideou, produciu e xestionou eventos como Ráfagas e Arde la Calle, e exposicións para La Caixa, Caja Madrid, Fundación Novacaixagalicia, o Concello da Coruña, a Comunidade de Madrid, o Concello de Valladolid e o Concello de Cádiz, entre moitos outros. Máis información en www.caravancultura.com.

Crearte Servizos Culturais é unha empresa especializada no deseño e na posta en marcha de actividades de mediación cultural dirixidas a todo tipo de públicos. Realizou a dinamización de innumerables exposicións e eventos para a Fundación Barrié, o Concello da Coruña, a Consellería de Cultura da Xunta de Galicia ou a Fundación Novacaixagalicia, entre outros. Máis información en www.creartesc.es.

Redes de sal é unha asociación sen ánimo de lucro que nace co fin de defender e fomentar o patrimonio mariño das costas e do Golfo Ártabro en particular, poñer en valor a riqueza natural e cultural que xeran os nosos mares e promover unha nova relación, máis amable e sustentable, da cidadanía co océano. Máis información en www.redesdesal.org

 

Dirección

Silvia Oviaño

Merce Carballo

Coordinación

Luis Cousillas

 

 

Comunicación

Coma Comunicación Creativa

Deseño

Coma Comunicación Creativa

Audiovisual

Óscar Górriz

Para obter máis información, escribir a info@festivalmardemares.org